TARİX İNSTİTUTU

Yaqub Mahmudov Küveytdə Azərbaycan həqiqətlərindən danışıb

04.11.2019 20:16

Azərbaycan Milli Elmlər Akademiyasının (AMEA) Tarix İnstitutunun direktoru, akademik Yaqub Mahmudovun rəhbərlik etdiyi nümayəndə heyəti Küveytin vəqflər və islam işləri nazirliyinin nəzdində fəaliyyət göstərən “İslam Araşdırmaları və Quran elmləri” departamentinin direktoru, doktor Fəhd Əl-Canfavi ilə görüşüb.

AMEA-nın Tarix İnstitutundan verilən məlumata görə, nümayəndə heyətinin tərkibinə institutun elmi katibi, dosent İradə Əliyeva, “Qarabağ tarixi” şöbəsinin müdiri, “İrəvan xanlığı: Rusiya işğalı və ermənilərin Şimali Azərbaycan torpaqlarına köçürülməsi” kitabının məsul redaktoru, dosent Güntəkin Nəcəfli və eyni adlı kitabın ərəbcə nəşrinin məsul redaktoru, şərqşünas, dosent Gülnur Mahmudova daxildir.

Görüşdə Yaqub Mahmudov Azərbaycan ilə Küveytin dost və qardaş ölkələr olduğunu bildirib. O deyib ki, Azərbaycanın xarici siyasətində islam ölkələri mühüm yer tutur: “Sovet dövründə Azərbaycan islam ölkəsi olduğu üçün çox ağır günlər yaşayıb. Sovet imperiyası Azərbaycanda islam dini ilə bağlı olan hər şeyi məhv etməyə çalışıb. O zaman məscidlər bağlanıb, görkəmli islam alimləri və din xadimləri məhv edilib, Qurani-Kərim tonqallarda yandırılıb. Bu qanlı tədbirlərə baxmayaraq xalqımız islamı qoruyub saxlaya bilib”.

Yaqub Mahmudov çıxışında qeyd edib ki, ulu öndər Heydər Əliyev xalqımızın milli-mənəvi dəyərlərinin qorunub saxlanmasında mühüm rol oynayıb: “Sovetlər dönəmində dağıdılmış Bibiheybət məscidinin bərpası Ulu Öndərin təşəbbüsü ilə həyata keçirilib. Hazırda ölkəmizdə yüzlərlə məscid var. Prezident İlham Əliyev və Birinci vitse-prezident Mehriban Əliyeva məscidlərin bərpası ilə bağlı məsələlərə xüsusi diqqət yetirir”.

Görüşdə Yaqub Mahmudov deyib ki, müasir Ermənistan Respublikasının ərazisi tarixi Azərbaycan torpaqlarıdır. Cənubi Qafqazda erməni dövləti ilk dəfə 1918-ci ildə yaradılıb. Erməni vandalları İrəvan xanlığının torpaqlarında, o cümlədən  İrəvan şəhərində 300-dən çox məscidi yerlə yeksan ediblər. Hazırda erməni vandalizmi işğal altında olan Qarabağ torpağında da davam edir. Orada məscidlərimiz və digər tarixi abidələrimiz məhv edilib, bəzi məscidlərimizdə isə donuz saxlanılır.

Görüşdə erməni vandalizmini özündə əks etdirən video-çarx nümayiş etdirilib.

Yaqub Mahmudov “İslam Araşdırmaları və Quran elmləri” departamentində Tarix İnstitutunun ərəb dilindəki nəşrlərinin - “İrəvan xanlığı: Rusiya işğalı və ermənilərin Şimali Azərbaycan torpaqlarına köçürülməsi”, “İrəvan xanlığı: İrəvan qalası - qəhrəmanlıq qalası”, “İrəvan xanlığı: Erməni vandallarının yox etdiyi İrəvan məscidləri”, “Çuxursəd hakimləri və İrəvan xanları” və “İrəvan xanlığı: Erməni vandallarının yox etdiyi Xan sarayı” kitablarının təqdimatını keçirib. Tədbirin sonunda həmin kitablar departamentə hədiyyə edilib.