AZƏRBAYCAN MİLLİ ELMLƏR AKADEMİYASI
Abbasqulu Ağa Bakıxanov adına
TARİX İNSTİTUTU
04.11.2022 14:54
“Albaniya tarix və mədəniyyət abidələri ilə tanışlıq” layihəsi çərçivəsində AMEA A.Bakıxanov adına Tarix İnstitutunun Atropatena-Albaniya (Qafqaz) tarixi şöbəsinin əməkdaşları ölkənin şimal-qərb regionunda elmi ezamiyyətdə olublar.
Onlar Şəki və Oğuz rayonları ərazisində olan alban dövrü abidələri ilə tanış olublar. Səfər müddətində iki rayonun ərazisində ümumilikdə 20-yə yaxın abidəyə baxış həyata keçirilib. Ezamiyyətin ilk günü şöbə əməkdaşları Şəkinin Baş Zəyzid kəndi ərazisində yerləşən Xaçvari kilsə, Zəyzid qalası, onlara yaxın ərazisində mövcud olan qədim qəbiristanlıq ərazisi (qədim alban qəbiristanlığı olduğu deyilir) ilə tanış olublar. Qeyd edək ki, abidələrin hər üçünün vəziyyəti qənaətbəxş deyil, kilsə və qala dağılma təhlükəsi ilə üz-üzədir, qəbiristanlıq ərazisi isə qorunmaq üçün sədlərə malik deyildir və ərazidə daha ciddi tədqiqata ehtiyac vardır. Daha sonra ezamiyyətdə olan qrup Baş Küngüt məbədi, Baş Küngüt qalası və qala divarları ilə tanış olublar. Məlumata görə, bu abidələrin də qorunma vəziyyəti heç də ürəkaçan deyil.
Ezamiyyətin növbəti günü qrup Şəki şəhərində Xan sarayına yaxın mövqedə yerləşən dairəvi Alban məbədi, həmçinin XVIII-XIX əsrlərə aid edilən Udin kilsəsi ilə tanış olublar. Sonrakı gün isə alban dövrü ilə məşğul olan əməkdaşlar Şəkinin Bideyiz kəndi ərazisində yerləşən qədim Alban məbədi, həmçinin Kiş məbədinə baş çəkiblər. Bideyiz kəndi ərazisində yerləşən digər Alban məbədi ilə tanışlıq isə yolun əlverişli olmaması səbəbindən növbəti ezamiyyətlərə saxlanılıb.
Oğuz rayonu ərazisində isə şöbə əməkdaşları Calut məbədi (həm köhnə məbədin qalıqları, həm də sonralar inşa edilən kilsə), Qarabulaq kəndi ərazisində olan iki Alban məbədi, eyni kəndin ərazisində olan qədim xristian qəbiristanlığı ilə tanış olublar. Qrup rəhbəri bu abidələrin də təyinatı, tarixləndirilməsi ilə bağlı ciddi tədqiqatlara ehtiyac olduğunu vurğulayıb.
Ezamiyyətin sonuncu günü isə əməkdaşlar Şəkinin Baş Şabalıd kəndi ərazisində yerləşən qədim Alban məbədi və qəbiristanlıq ərazisi ilə tanış olublar.
Layihə ilin sonuna qədər davam edəcək və alban dövrü ilə məşğul olan əməkdaşlar ölkənin digər bölgələrində olan abidələrlə də tanış olmaq üçün ezam olunacaqlar.
İctimaiyyətlə əlaqələr şöbəsi,
info.tarixinstitutu@gmail.com
(+994) 70 253 75 93
© Bütün hüquqlar qorunur.Xəbərlərdən istifadə edərkən http://www.tarixinstitutu.az saytına istinad zəruridi