AZƏRBAYCAN MİLLİ ELMLƏR AKADEMİYASI
Abbasqulu Ağa Bakıxanov adına
TARİX İNSTİTUTU
22.10.2024 09:47
AMEA A.A.Bakıxanov adına Tarix və Etnologiya İnstitutu ənənəsinə sadiq qalaraq kitab çapına böyük önəm verir, Azərbaycanın elmi dövriyyəsini, elmi-ictimai fikrini daim tədqiqat əsərləri, monoqrafiyalarla zənginləşdirir.
Bu günlərdə Tarix və Etnologiya İnstitutunun növbəti nəşri işıq üzü görmüşdür. İnstitutun “Qərbi Azərbaycan” şöbəsinin aparıcı elmi işçisi, tarix üzrə fəlsəfə doktoru, dosent Elçin Qarayevin “Qərbi Azərbaycan XIX yüzilliyin ikinci yarısı-XX yüzilliyin əvvəllərində (İrəvan quberniyasının materialları əsasında)” monoqrafiyası çap edilmişdir. Monoqrafiya Tarix və Etnologiya İnstitutunun Elmi Şurasının qərarı ilə çapa məsləhət görülmüşdür.
Əsərdə ilkin mənbələr və arxiv materialları əsasında İrəvan quberniyasının siyasi, sosial iqtisadi və mədəni həyatı tədqiq edilir. Burada İrəvan quberniyasının yaranması, ərazisi, inzibati-ərazi bölgüsü, idarəçilik sistemi, təsərrüfat məişəti, torpaq sahibliyi və torpaqdan istifadə, vergilər və digər mükəlləfiyyətlər, əhalinin etnik say tərkibi, sosial-silki tərkibi, şifahi xalq ədəbiyyatı, təhsil, mətbuat, teatr, bölgənin mədəni həyatının müxtəlif sahələri, eləcə də 1870-ci il, 1912-ci il islahatlarının quberniyanın həyatına təsiri və s. məsələlər araşdırılır.
Monoqrafiyanın yazılmasında məqsəd Qərbi Azərbaycan torpaqlarının bir parçası olan İrəvan quberniyasının tarixini ətraflı tədqiq etmək, bu bölgənin Azərbaycanın qədim və ayrılmaz tərkib hissəsi olmasını dünya ictimaiyyətinin diqqətinə çatdırmaqdır.
__________________
İctimaiyyətlə əlaqələr şöbəsi
info.tarixinstitutu@gmail.com
+994 70 253 75 93
© Bütün hüquqlar qorunur.Xəbərlərdən istifadə edərkən http://www.tarixinstitutu.az saytına istinad zəruridir