TARİX İNSTİTUTU

20 Yanvar – milli qürur tariximiz

19.01.2026

Tədbir Azərbaycan xalqının azadlığı və müstəqilliyi uğrunda canlarından keçmiş 20 Yanvar şəhidlərinin xatirəsinin bir dəqiqəlik sükutla yad edilməsi ilə başlanıb.

Dəyirmi masanı giriş sözü ilə açan Tarix və Etnologiya İnstitutunun elmi işlər üzrə direktor müavini, tarix elmləri doktoru İlqar Niftəliyev 20 Yanvar faciəsinin Azərbaycan tarixində yerinə toxunub. O, bu faciənin yalnız qanlı bir hadisə deyil, eyni zamanda xalqımızın milli azadlıq iradəsinin, müstəqillik əzminin parlaq təzahürü olduğunu vurğulayıb. Tarix elmləri doktoru İlqar Niftəliyev deyib ki, 20 Yanvar hadisəsi Azərbaycan xalqının sovet imperiyasına qarşı apardığı azadlıq mübarizəsində dönüş nöqtəsi olub, milli oyanışın güclənməsinə gətirib çıxarıb.

Tədbirdə “Azərbaycanın sovet dövrü tarixi” şöbəsinin müdiri, tarix elmləri doktoru, professor İkram Ağasiyev “20 Yanvar – tariximizin qanlı və şanlı səhifəsi” mövzusunda çıxışında faciənin tarixi-siyasi səbəblərini, nəticələrini və milli yaddaşda tutduğu yeri ətraflı təhlil edib.

“Tarixin nəzəriyyəsi, mənbəşünaslıq və tarixşünaslıq” şöbəsinin müdiri, tarix elmləri doktoru, dosent Vaqif Abışov “20 Yanvar: reallıqlar və uydurmalar” mövzusunda məruzəsində hadisələrlə bağlı dolaşan yanlış təsəvvürlərə elmi arqumentlərlə aydınlıq gətirib.

“Azərbaycanın sovet dövrü tarixi” şöbəsinin elmi işçisi Aybəniz Osmanova “20 Yanvarın alim şəhidləri” mövzusunda çıxış edərək faciə zamanı şəhid olmuş elm xadimlərinin xatirəsini yad edərək onların Azərbaycan elminə verdiyi töhfələrdən danışıb.

“Azərbaycanın sovet dövrü tarixi” şöbəsinin aparıcı elmi işçisi, tarix üzrə fəlsəfə doktoru, dosent Raisə Cəfərova “Azadlıq hərəkatının 20 Yanvar zirvəsi” adlı çıxışında 20 Yanvar hadisələrinin ümummilli azadlıq hərəkatının kulminasiya nöqtəsi olduğunu deyib.

Tarix üzrə fəlsəfə doktoru, dosent İlham Həsənov isə “Poeziyamızda 20 Yanvar şəhidləri” mövzusunda məruzə ilə çıxış edərək Azərbaycan ədəbiyyatında 20 Yanvar faciəsinin bədii əksini, şəhidlik mövzusunun poeziyada ifadə forma və üsullarını diqqətə çatdırıb.

Dəyirmi masa zamanı iştirakçılar 20 Yanvar faciəsinin elmi cəhətdən dərindən öyrənilməsinin, tarixi həqiqətlərin gənc nəsillərə düzgün çatdırılmasının və milli yaddaşın qorunmasının vacibliyini vurğulayıblar.

______________

İctimaiyyətlə əlaqələr şöbəsi

070-253-75-93

info.tarixinstitutu@gmail.com

© Bütün hüquqlar qorunur.Xəbərlərdən istifadə edərkən http://www.tarixinstitutu.az saytına istinad zəruridir